A Xunta recoñece que a Comunidade Educativa e o BNG tiñan razón e vese na obriga de comezar a cubrir os patios do IES de Soutomaior.

O BNG celebra a instalación da nova pequena cuberta, mais é insuficiente. A falta de espazo tamén afecta á matriculación do novo alumnado e xa a propia dirección do IES e o Consello Escolar demandaron a construcción de dúas aulas máis para poder dar cabida a esta demanda no vindeiro curso.

BNG Soutomaior 28 feb. 2022 - 18:14

BNG SOUTOMAIOR EDUCACIÓN MANUEL LOURENZO

O voceiro municipal do BNG, Manu Lourenzo, explica que o IES Soutomaior xa creara debate co seu proxecto de construción, elaborado pola Xunta en setembro de 2015. A primeira proposta presentaba un proxecto de centro de Educación Secundaria Obrigatoria (ESO) que contaba con doce unidades e cunha superficie total de 4.150 metros cadrados.

Logo das protestas do BNG no pleno de Soutomaior e no Parlamento Galego, a Xunta optou polas 16 unidades para que no edificio tamén se puidese impartir o nivel de Bacharelato. Educación accedeu a incrementar o número de unidades, mais mantendo a superficie inicial. Agustín Reguera, no canto de velar polos intereses da veciñanza e da mocidade, aceptou o proxecto sen criticalo, só coa intención de poder cortar cinta e vender como un logro a o que foi a perda dunha oportunidade para o ensino de Soutomaior.

Isto provocou numerosos problemas, como as faltas de comedor escolar ou pavillón polideportivo, unido a carencia dun patio cuberto que permita ao alumnado pasar os recreos fóra das aulas cando o tempo non é favorable. No último ano, incluíse unha pequena cuberta que o BNG celebra, xa que palía unha parte destes problemas, mais é medida completamente ineficiente, en especial no contexto de pandemia no que os grupos teñen espazos delimitados e están fora desta cuberta.

A falta de espazo tamén afecta á matriculación do novo alumnado. A demanda de prazas dende os centros de adscrición directa (o CEIP Manuel Padín Truiteiro e o CEIP de Ponte Sampaio) excede a oferta do centro, polo que unha gran parte do alumnado de escolas dos arredores non pode acceder ao IES Soutomaior, a propia dirección do IES e o Consello Escolar demandaron a construcción de dúas aulas máis para poder dar cabida a esta demanda no vindeiro curso.

Manu Lourenzo fixo fincapé na gravidade de que un instituto de só tres anos de antigüidade estea a experimentar a necesidade de tantas modificacións na súa estrutura, modificacións que xa se dixo antes da súa construcción que ian a ser necesarias, polo que volve a demandar a ampliación definitiva do centro e evitar que o alumnado se atope con tantos obstáculos para ter o ensino que Soutomaior merece.

A Xunta recoñece que a Comunidade Educativa e o BNG tiñan razón e vese na obriga de comezar a cubrir os patios do IES de Soutomaior.