O IES de Soutomaior, un centro educativo que foi inaugurado hai tan só tres anos, tivo dende o primeiro momento problemas para atender a demanda de matrículas. Este ano non foi diferente. Esta situación desembocou en grupos saturados, aulas pequenas, espazos comúns que non poden dar cabida nin ao profesorado nin ao alumnado, falta de instalacións deportivas cubertas ou dun salón de actos… Ademais, as reducidas dimensións da sala de profesores provoca que nela tan só poida estar a metade do claustro.

Por se isto non fose suficiente, trátase dun centro no que nos días de chuvia o alumnado ten que permanecer nas aulas porque non conta con espazos cubertos no exterior. Nunha situación de pandemia como a que nos atopamos, manter á rapazada en espazos pechados durante o tempo e cunha ventilación mínima das aulas é unha irresponsabilidade.

O BNG leva dende o ano 2015 esixindo que se modifique o proxecto para atender as necesidades do alumnado e evitar futuros problemas. Posteriormente, cando se demostrou que esas demandas eran necesarias, o BNG volveu reclamar, a través do seu portavoz municipal Manu Lourenzo tanto no pleno municipal como no Parlamento galego, que se fixesen as obras necesarias para corrixir estas deficiencias.

A este respecto, Manu Lourenzo sinalou que “o BNG leva seis anos xa avisando de que todo isto ía pasar”. “O instituto debería funcionar como cabeceira comarcal, mais preferiron priorizar o seu obxectivo de cortar cinta e sacar fotografía para as eleccións; de aí veñen os problemas”, engadiu. Non contentos con esa irresponsabilidade, o PP decidiu incumprir a promesa que fixera para este curso de habilitar espazos para ter mais aulas. Outra dos compromisos incumpridos tamén era cubrir o patio. “Dende o BNG esiximos que se resolvan todas estas carencias, porque as nosas mozas non merecen este desprezo do PP local e autonómico”, afirmou Lourenzo. “Son eles os que pagan as consecuencias, ao ter que estar nos corredores  nos días de chuvia ou ter que apiñarse en clases diminutas nas que teñen que estar case 30 alumnos”, concluíu.