O BNG  denunciou no día de onte que unha nova “chapuza” presentada polo  PP fixo que a veciñanza de Soutomaior perdese case 350.000 € do Plan ReacPon. Este plan da Deputación de Pontevedra repartiu máis de 26 millóns de euros por concorrencia competitiva entre 47 concellos de toda a provincia.

 Dos 55 concellos presentados, 47 deles, de todas as cores políticas, cumpriron os requisitos e superaron a nota de corte, polo que recibirán importantes cantidades de diñeiro para os seus proxectos. Pero no caso de Soutomaior, a pesar de que as bases eran públicas e coñecidas, o proxecto do goberno local de Agustín Reguera non acadou a nota mínima e quedou entre os últimos da provincia. As consecuencias de presentar esta chapuza, sinalou Manu Lourenzo son que” a veciñanza de Soutomaior perderá case 350.000 € en axudas para a reactivación”

Só 8 concellos dos presentados perderon estes cartos, entre eles Soutomaior. Pero por se isto non fose dabondo, dende o BNG sinalan que “é a segunda vez que perdemos unha subvención para unha obra neste mesmo trazado do camiño de Santiago. A primeira vez foi a Xunta quen lle tirou das orellas ao goberno local e negou unha subvención e agora é un concurso público da Deputación quen lle saca as cores ao goberno local de Soutomaior por presentar un proxecto chapuceiro que nos retrata como os “pechacancelas” de toda a provincia.

Manu Lourenzo sinalou que “cando todo o mundo compite por modernizar e dinamizar os seus concellos, aquí estamos anquilosados no século pasado. Son incapaces de presentar un proxecto serio e moderno que poida competir e por iso quedamos sempre de últimos en todo, na sanidade, na educación, no urbanismo... Temos un goberno que só é eficiente para adxudicar obras a empresas de Lugo de familiares do PP; cando se trata de traballar e facer proxectos serios que poidan competir con outros concellos, facemos estes ridículos”