O pasado 1 de xullo, o BNG de Soutomaior presentou unha solicitude de pleno extraordinario pola situación sanitaria do concello, despois de coñecer que Soutomaior ía quedar sen servizo de pediatría e matrona durante todo o mes de xullo debido a que o PP non ía cubrir as vacacións do persoal do centro de saúde do concello.

Pese á urxencia desta situación, que afecta e afectará a moitas familias do concello durante todo xullo, o alcalde, Agustín Reguera, optou por seguir a estratexia do PP na Xunta e deixar correr os días até esgotar o prazo da convocatoria, que finalmente chegou para o 18 de xullo. 18 días nos que a veciñanza viuse absolutamente sola, sen que Agustín fixese absolutamente nada por intentar mellorar a situación sanitaria. Máis grave aínda nun mes de xullo que, como recollen todos os días os medios de comunicación, está a ser dos máis calorosos desde que hai rexistros, sabendo ademais que os nenos e nenas son un dos colectivos máis vulnerables ás altas temperaturas.

O portavoz municipal do BNG e deputado no Parlamento, Manu Lourenzo, criticou a “inacción do PP para intentar resolver unha situación denigrante para a veciñanza” como é a falta de persoal sanitario. “Cun alcalde serio, o pleno extraordinario estaría convocado canto antes. Agustín Reguera, en cambio, fai seguidismo do PP e deixa correr o tempo sen facer nada, agardando que a xente esqueza o tema e non lle diga nada”, explicou.

Para o BNG tamén resulta lamentábel que durante a Comisión de Sanidade de Soutomaior, celebrada o mércores 13, ante as propostas e solicitudes do BNG, o grupo do goberno optou polo silencio cómplice. En palabras do concelleiro Diego Moreira, “a única palabra que dixo o voceiro do goberno ante todas as propostas foi que se abstiñan, o cal é unha falta de respecto para a veciñanza que está a sufrir, Soutomaior non merece un goberno ausente e que se se abstén ante os problemas, que se posiciona coa Xunta e co PP contra Soutomaior”.